RECUNCHO DE LECTURA

Desde o mes de abril, dispoñemos dun novo espazo lector no cole! Situado no vestíbulo, fronte á secretaría, este recuncho pon á disposición de todos as últimas adquisicións da biblioteca. 

Un novo espazo para gozar da lectura

e descubrir novas aventuras!

AMIGOS INVISIBLES

Cada ano somos máis, profesores e persoal non docente, que nos anotamos á cita do "Amigo invisible" para celebrar o Día do Libro.

Con moito devezo, esperamos o día para abrir o noso agasallo!

Aquí tedes un elenco dos libros que foron elixidos para 

este día tan desexado!

REINVENTAMOS PORTADAS DE LIBROS

Para celebrar o Día do Libro, algúns dos nosos alumnos atrevéronse a reinventar as portadas dos seus libros preferidos.

Aquí tedes unha mostra do seu talento:

Aroa, Candela, Gabriela e Noa (6º de Primaria)

Guille (1º ESO) e o seu irmán Brais (3º de Primaria)

Noa (6º de Primaria)

María (3º de Primaria)

Aroa (6º de Primaria)

Ricardo (6º de Primaria)

Storytelling con títulos de libros

Con motivo da celebración do Día do Libro (23 de abril), o alumnado do centro elaborou unhas formidables historias a partir de títulos de obras da nosa biblioteca. Podemos ver os seus traballos nesta ligazón de youtube.

Poesía para interpretar os días

 

Co gallo da celebración mundial do Día da Poesía, o 21 de marzo, o alumnado do noso centro quixo facer visibles os textos que máis os inspiran, ben foren de produción propia, ben de poetas de todos os tempos. Algunhas mostras de poemas nas xanelas podémolas ler aquí:

Outra proposta consistiu na creación de poesía a partir do riscado de textos xornalísticos:

Non faltaron as pequenas doses de tratamento poético, contidas en pílulas de cores, e dedicadas polo alumnado de todo o centro a quen quixer abrir e descubrir unhas palabras cheas de sentimento e emoción:

Presentación do poemario Cristal, de Alexandre Corbillón

 Con motivo da celebración do Día da Poesía, o 21 de marzo, na nosa biblioteca, fixo a presentación do seu primeiro libro o poeta celanovés Alexandre Corbillón. 

 Baixo o significativo título de Cristal -material con múltiplas propiedades: duro, fráxil, reflector, opaco, translúcido...- o novel poeta presenta unha colectánea bilingüe de composicións de distinto fondo, resultado da vivencia persoal levada ao texto, sempre inspirado pola música que acompaña ao longo dos anos os seus momentos de introspección.

Os poemas preséntanse ordenados seguindo unha transición anímica, que vai desde a desesperación e a tristeza ata a liberación dunha personalidade construída sobre a fortaleza de quen supera a adversidade. Así nos expuxo Alexandre Corbillón o proceso de creación e o seu resultado, con referencias ás lecturas das que se recoñece debedor -como a poesía rosaliana, o hilozoísmo da vangarda galega ou as reflexións do grande Carlos Casares-, aos temas musicais de cada momento e o recitado dalgúns dos poemas propios. É a súa, pois, unha obra intimista, edificada sobre o diálogo entre o pensamento poético e a música.

Contamos tamén coa presenza da autora do cadro que ilustra a capa, Lorena Fernández, que nos explicou a orixe, técnica e significado da súa pintura, e a relación estreita que garda coa cerna do poemario. Deste xeito, asistimos de novo a un transvasamento de formas e significados entre artes: desta vez, entre a pintura e a lírica.

Como guinda a un marabilloso encontro co autor de Cristal (dispoñible na nosa biblioteca), realizouse tamén un pequeno obradoiro de composición usando como detonante a música. O resultado foi a lectura de ideas moi inspiradas, ou a expresión de sentimentos que nos xurdiron ao compás do tema que soaba na sala.

Ao remate, a nosa presentadora e co-organizadora, Bárbara Aldemir (4º ESO) despide o acto cunhas emotivas palabras e coa entrega dun pequeno agasallo aos participantes.

PREPARAMOS O ENTROIDO NA BIBLIOTECA

 A nosa biblioteca transformouse nun taller de confección para deseñar os disfraces do Entroido deste ano. 

Vacas, abellas, pitiños, ovellas, porquiños, insectos voadores, lobos e osos foron os protagonistas desta festa ecolóxica. Sen esquecer as nosas "Gretas", activistas comprometidas co medio ambiente.

SEMANA DA NARRACIÓN ORAL NA BIBLIOTECA

Dende o martes 22 ata o venres 25 de marzo, a biblioteca converteuse nun lugar aberto á narración oral. 

Nenos e nenas de Primaria e da ESO puxeron o "sombreiro de contar historias" e transformáronse en verdadeiros contacontos profesionais. Interpretaron contos tradicionais como Os tres porquiños e A cabra e os sete cabritiños; outros de factura máis recente como A bruxa regañadentes, O grúfalo ou A estraña visita; revisións de contos clásicos como O lobo con botas e tamén algún relato breve popular da zona. 

Os espectáculos tiveron lugar na biblioteca durante os recreos e incluíron a participación espontánea de membros do público, que sorprenderon con apaixonantes ficcións propias ou co misterio e o terror de narracións recollidas nos seus fogares. Foi todo un éxito!

Parabéns aos narradores!!!!